Чиқади? Чиқмайди? Чиқади... Янги Galaxy FE смартфони ҳақидаги миш-мишлар мухлисларга умид бермоқда
Агар сиз ҳам биз каби янгиликларни мунтазам равишда кузатиб келаётган бўлсангиз, унда сўнгги ойларда Samsung компаниясининг янги авлод Galaxy FE моделини чиқарилишига оид янгиликлардан сизнинг ҳам бошингиз айланиб кетгани аниқ. Гап шундаки, Жанубий Корея компанияси анчадан бери ўзининг янги Fan Edition смартфонини чиқариш-чиқармаслиги ҳақида миш-миш қилиб келинмоқда. Ўтган йили у "чиқарилмайди" дейилди, кейин "Galaxy S23 FE бўлади" дейилди. Яқиндагина эса Galaxy S23 FE ҳам бекор қилингани айтилган бўлса, сўнгги хабарлар Samsung мухлислари қалбида яна умид учқунларини пайдо қилди.
SamMobile нашрининг хабар беришича, Samsung бу йил ўзининг Galaxy S23 FE смартфонини чиқаради ва у компаниянинг Exynos чипсети билан жиҳозланган бўлади. Бу мантиқан тўғри бўлиши мумкин, чунки Samsung феврал ойида ўзининг Galaxy S23 смартфонларини барча ҳудудлар учун Qualcomm Snapdragon чипсети билан чиқарган. Авваллари эса Galaxy S ва FE смартфонлари мамлакатларга қараб ё Snapdragon, ёки Exynos чипи билан таклиф қилинар эди.
Шундай қилиб, Galaxy S23 Fan Edition модели барча ҳудудлардаги бозорлар учун Exynos 2200 билан тақдим қилинади. Бундан ташқари, смартфондаги энг катта янгиланиш унинг орқа томонидаги 50 мегапикселли асосий камераси бўлиши айтилмоқда. Шу ерда айтиш керакки, Galaxy 20 FE ва Galaxy S21 FE смартфонлари 12 MP асосий камера билан жиҳозланган эди, худди Galaxy S20 ва Galaxy S21 моделларида бўлгани каби. Табиийки, Galaxy S23 FE ҳам Galaxy S22 ва Galaxy S23 ортидан боради.
Шунингдек, бўлажак смартфон 128 ва 256 GB доимий хотира вариантларида 6 ёки 8 GB оператив хотира билан тақдим қилинишини таҳмин қилинмоқда. Унинг батареяси эса ўзгаришсиз, 4500 мА/соат бўлиб қолиши ва у 25 Вт тезликда қувват олиши мумкин (Samsung сахийлик қилиб қувватлаш тезлигини 45 Вт га кўтариши мумкинлиги эҳтимоли ҳам йўқ эмас).
Маълум бўлишича, Galaxy S23 FE смартфони Galaxy S линиясига мос равишда SM-S711х модел рақамига эга бўлади. Манбага кўра, смартфон жорий йилнинг тўртинчи чорагида, октабр-декабр ойларида тақдим қилинади.
