Илон Маскдан яна бир "Х" компания ва у сунъий интеллект билан боғлиқ!
Интернетда бир неча кундан бери Илон Маск ўзининг янги сунъий интеллект маҳсулотини чиқариши ҳақида миш-миш тарқалиб юрибди. Улашилган маълумотларга кўра, миллиардер ўзининг бўлажак СИ хизматини ишга тушириш учун роппа-роса 10 мингта график карталар сотиб олган. Сўнгги хабарлардан маълум бўлишича, Маск аллақачон сунъий интеллект билан боғлиқ ўзининг яна бир "Х" компаниясига асос солиб ҳам улгурган.
The Wall Street Journal нашрининг хабар беришича, Илон Маск ўзининг "Х.AI Corp." номли компаниясини жорий йилнинг 9 март куни АҚШнинг Невада штатида рўйхатдан ўтказган. Ҳозирда миллиардернинг ўзи компания раҳбари, унинг "оилавий офиси" директори бўлмиш Жаред Бирчалл эса унинг секретари сифатида қайд этилган.
Катта-катта технологик компаниялар раҳбари "Х" ҳарфини алоҳида ёқтириши ҳеч кимга сир эмас – Х.AI Маск яқинда Twitter компаниясини бирлаштириб юборган "Х Corp.", ҳамда, у анчадан бери яратишни орзу қилиб юрган "Х – ҳамма нарса" иловаси номлари билан уйғунлашади.
Таъкидлаш жоизки, Илон Маск сунъий интеллект лойиҳаларига бегона эмас ва у бугунги кунда ҳам ушбу мавзудаги муҳокамаларда фаол иштирок этади. Бунга мисол қилиб миллиардер яқинда GPT-4 авлодидан кучлироқ бўлган сунъий интеллект технологияларини тайёрлашни камида олти ойга тўхтатиб туриш учун чиқарилган оммавий хатга имзо қўйганлигини келтириш мумкин. Ҳа, айтганча, Маск бугунги кунда ChatGPT сунъий интеллект чатботи билан одамлар оғзидан тушмаётган OpenAI компанияси асосчиларидан бири эканлигини билармидингиз? У бу компанияни 2018 йилда тарк этган эди.
(The Verge орқали)
