iOS 17 билан Apple'нинг ҳам ушбу энг оммабоп флагманлари нафақага чиқиши мумкин
Ўтган йили iOS 16 ва iPadOS 16 янгиланишларини чиқарилганида кўплаб Apple қурилмалари, хусусан, iPhone 6s, iPhone 6s Plus, iPhone 7, iPhone 7 Plus, биринчи авлод iPhone SE билан бирга иккинчи авлод iPad Air, тўртинчи авлод iPad mini моделлари учун қўллаб-қувватлаш якунлангани маълум бўлган эди. Навбатдаги iOS янгиланиши ҳам бир қанча iPhone смартфонлари iPad планшетларини нафақага кузатиши мумкин.
Ўз манбаларига асосланиб MacRumors нашрининг хабар беришича, iOS 17 янгиланиши iPhone 8, iPhone 8 Plus ва iPhone Х смартфонларини, iPadOS 17 эса 9.7 дюймли, ҳамда, 12.9 дюймли биринчи авлод iPad Pro билан бешинчи авлод iPad планшетларини қўллаб-қувватламайди, яъни ушбу моделлар янгиланишни қабул қилмайди.
Таъкидлаш жоизки, ушбу Apple смартфон ва планшетлари 2015-2017 йиллар оралиғида чиқарилган ва агар миш-мишлар тўғри бўладиган бўлса, демак iOS ва iPadOS янги версиялари А11 Bionic ёки ундан паст моделдаги чипларда ишлайдиган қурилмалар билан "келиша олмайди", фақатгина А10 Fusion чипи билан жиҳозланган олтинчи ва еттинчи авлод iPad, ҳамда, А10Х Fusion чипи билан жиҳозланган иккинчи авлод iPad Pro планшетлари бундан мустасно бўлиши мумкин.
Маълум бўлишича, iOS 17 ишлаш самарадорлиги ва барқарорликни яхшилашга қаратилган версия бўлади ва ундан катта ўзгаришларни кутмаслик керак, фақат битта нарсадан ташқари – ўтган йили динамик орол ҳақидаги маълумотларни ошкор этган аноним манба берган маълумотларга кўра, янги iOS версияси тизимдаги Control Center (Бошқарув маркази) панелига катта ўзгаришни ўз ичига олади. Айтиш керакки, бу ушбу функция тақдим қилинганидан кейинги илк катта ўзгариш бўлади – функция ўн йил аввал iOS 7 билан чиқарилган ва у iOS 11 дан сўнг ўзининг ҳозирги кўринишини олган.
iOS 17, iPadOS 17 ва Apple'нинг бошқа операцион тизимлари 5 июн куни бўлиб ўтадиган WWDC23 тақдимотида намойиш қилиниши кутилмоқда.
