Жаҳлдор қушлар ва Соник типратикан бирлашмоқда!
Яқинда исроиллик мобил ўйинлар ишлаб чиқарувчи Playtika компанияси ўзининг Angry Birds номли ўйини билан танилган Rovio компаниясини 800 миллион долларга сотиб олиш таклифи билан чиққан эди. Бироқ, бу музокара расман март ойида омадсиз якунланган. Эндиликда маълум бўлишича, финландиялик компанияни Sega қўлга киритиши мумкин.
The Wall Street Journal нашри масаладан хабардор одамлар берган маълумотларга асосланиб хабар беришича (The Verge орқали), Sega компанияси Rovio Entertainment'ни 1 миллиард долларга сотиб олиш келишувига яқинлашмоқда. Япониялик бизнес конгломерати музокараларни келаси ҳафта бошида якунлаши мумкин.
Sega ёхуд унинг бош компанияси бўлмиш Sega Sammy Holdings айнан Rovio Entertainment учун шунча маблағ сарфлаётган қизиқ туюлади, чунки сўнгги йилларда Angry Birds ўйинларига бўлган қизиқиш сезиларли даражада камайган – франшиза машҳурлиги 2014 йилда энг юқори нуқтага чиққандан бери "қулашда" давом этмоқда.
Rovio компаниясининг Angry Birds ўйини 1 миллиард юклаб олишлар натижасига эришган энг биринчи мобил ўйин ҳисобланади ва бу "Гиннес рекордлар китоби"га киритилган. Ўйиннинг 2016 йилда чиқарилган анимацион филми, The Angry Birds Movie эса ҳозирда энг юқори даромад келтирган ўйин филмлари орасида еттинчи ўринда туради.
Энг биринчи чиқарилган Angry Birds ўйинини 2019 йилда иловалар дўконларидан олиб ташлангандан кейин, 2022 йилда пулли тарзда қайтарилди. Аммо, унинг ҳам даври узоққа чўзилмади: яқинда Rovio жорий йилнинг 26 феврал куни фойдаланувчиларни бир марта сотиб олиб бир умр текинга ўйналадиган оригинал Angry Birds'дан кўра, бепул, лекин ички сотувлари мавжуд бўлган бошқа ўйинларига ўтишга ундаш учун ўйинни Google'нинг Play Store дўконидан олиб ташланишини, Apple'нинг App Store дўконида эса номи ўзгартирилишини эълон қилган эди.
