Samsung компанияси iPhone эгаларини ўз томонига оғдириб олиш учун янги тактикани қўлламоқда
Google, Xiaomi ёки бошқа Android смартфон ишлаб чиқарувчилари эмас, балки фақат Apple'га қарши – Samsung компанияси "Galaxy эгаси бўлмаган фойдаланувчилар" учун ўзининг "Try Galaxy" веб-иловасини янгилаганлигини эълон қилди. Гап шундаки, веб-илова фақат айфончилар учун чиқарилган ва ундан сиз Google Pixel ёки бошқа Android смартфонингизда фойдалана олмайсиз.
Янги "Try Galaxy" иловаси билан iPhone эгалари Galaxy S23, Galaxy Z Flip 4 ва Galaxy Z Fold 4 смартфонларининг интерфейси тажрибасини онлайн синаб кўришлари мумкин. Бунинг учун улар trygalaxy.com сайтига киришлари ва у ердаги QR-кодни сканер қилишлари кифоя. Сиздан веб-иловадан Safari браузерида фойдаланиш ва уни Бош экранга ўрнатиш сўралади.
Таъкидлаш жоизки, бу iOS'ни тўлиқ Galaxy S23 интерфейсига ўзгартириб берадиган launcher илова эмас, балки у тўғридан-тўғри браузерда ишлайди.
Барчаси тайёр бўлгандан кейин онлайн дастур iPhone эгаларига Android 13 га асосланган One UI 5.1 версиясининг "мазасини тотиб кўриш" имконини беради. Нима қандай ишлаши тушунтириб бериладиган тезкор қўлланмадан сўнг сиз платформа бўйлаб айланиб юришингиз мумкин. Эҳтимол, илова онлайн бўлгани учун у бироз кечикишлар билан, қотиб ишлаши мумкин, лекин интернет яхши бўлса, муаммо бўлмайди.
Веб-иловада iPhone эгалари Samsung ва Google'нинг асосий иловаларини синаб кўришлари мумкин. Масалан, хабар алмашиш иловасидан. У ерда Samsung сизга Object Eraser (суратлардан кераксиз нарсаларни ўчириб берадиган хусусият) каби бошқа функсияларни синаб кўришни эслатадиган сохта SMS хабарлар юборади.
Бундан ташқари Samsung веб-иловадаги Созламар менюсида орқа фон ва интерфейс стилини ўзгартириш, ҳамда, хавфсизлик созламаларини синаб кўришни тавсия қилган ҳолда уларни алоҳида кўк рамка билан кўрсатади. Қолаверса, веб-иловада Samsung Health, Smart Switch ва бошқа иловаларни ҳам синаб кўриш имконияти мавжуд.
Бу iPhone эгаларига Galaxy томонга ўтиш учун қанчалик ёрдам беради буниси номаълум, лекин Жанубий Корея компанияси ўзининг Try Galaxy веб-иловаси ўтган йили ишга туширилганидан бери 2 миллиондан ортиқ маротаба юклаб олинганлигини таъкидлайди.
