Мана сенга ўша кайф: OpenAI ўзининг ChatGPT хизматини Италияда блоклади
Жума куни Италиянинг Маълумотларни ҳимоя қилиш органи, Гаранте, ChatGPT хизматини фойдаланувчилар маълумотларини ноқонуний йиғиш ва қайта ишлашда айблаб, унга қарши тергов ишларини бошлаган эди. Сунъий интеллект чатботи компанияси, OpenAI эса ушбу ҳолатга ўз муносабатини билдирди – компания ўзининг ChatGPT платформасини Италияда блокировка қилди (TechCrunch орқали).
Ҳозирда Италия мамлакати IP-манзили билан ChatGPT сайтига кирган фойдаланувчилар қуйидаги онлайн баёнотга дуч келишмоқда:
Унда компания ChatGPT Италиядаги фойдаланувчилар учун ўчирилганлигини ва бундан афсусда эканликларини маълум қилади. Шунингдек, баёнотда ўтган ой ChatGPT Plus обунасини сотиб олган Италиядаги барча фойдаланувчиларга тўловлари қайтарилиши ва фойдаланувчилардан янги ой учун обуна тўловини янгилаш вақтинчалик тўхтатилганлиги маълум қилинган.
"Биз одамлар махфийлигини ҳимоя қилишга содиқмиз ва биз GDPR ва бошқа махфийлик қонунларига мувофиқ ишлайдиган ChatGPT таклиф қиламиз. Биз (ChatGPT'га) кириш ҳуқуқингизни имкон қадар тезроқ тиклаш мақсадида Гаранте билан ҳамкорлик қиламиз" дейди OpenAI.
Маълум бўлишича, OpenAI ҳозирда Италия учун оддий геоблок усулини қўлламоқда ва буни VPN ёрдамида IP-манзилни ўзгартириш билан четлаб ўтиш мумкин. Бироқ, агар аккаунт дастлаб Италияда очилган бўлса, унда VPN ҳам ёрдам бермаслиги ва бунда италян фойдаланувчилар бошқа IP-манзил билан янги аккаунт очишлари керак бўлади.
