O‘zbekistonning barcha shaharlarida "Aqlli shahar" konsepsiyasi joriy qilinishi mumkin
O‘zbekistonda "Aqlli shahar" konsepsiyasini joriy qilish rejalashtirilmoqda. Ushbu taklif Innovatsiya vazirligi tomonidan loyihalar muhokamasi portaliga kiritilgan.
Konsepsiyani joriy qilishdan asosiy maqsad, innovatsion texnologiyalardan foydalangan holda hududlarda zamonaviy sanoat zonalari va infrastrukturalarni yaratish hisoblanadi.
Konsepsiya doirasida quyidagi yo‘nalishlarda texnologiyalar joriy qilinadi: aqlli transport, elektron militsiya, xavfsizlik tizimi, elektron ta’lim, elektron sog‘liqni saqlash, aqlli energetika va suv ta’minoti kabi yo‘nalishlar innovatsion tizimda faoliyat yuritishi rejalashtirilgan, deb yozadi Turon24.uz.
Loyihada aytilishicha, aqlli transport faoliyati yo‘lga qo‘yilgach, jamoat transportlarining qayerda kelayotgani va bekatga kelish vaqti oldindan ma’lum bo‘ladi, elektromobillar quvvatlanishi uchun maxsus stansiyalar quriladi.
Elektron militsiya va xavfsizlik tizimi ishga tushganida har qanday qo‘ng‘iroq bo‘layotgan manzil xaritada aks etadi. Bu o‘z navbatida ichki ishlar xodimlarining tezkor ishlashiga yordam beradi.
Elektron ta’lim tizimida ta’lim jarayoniga yangi innovatsion usullar joriy etiladi va masofaviy ta’lim olish imkoni yaratiladi.
Elektron sog‘liqni saqlash bemorlarning yagona axborot bazasi shakllantirilishiga zamin yaratadi. Bundan tashqari, elektron tibbiy kartalar ham joriy qilinadi.
Aqlli energetika va kommunal xo‘jalik tizimi bo‘yicha qayta tiklanuvchi resurslar joriy etiladi. Isitish va sovitish qurilmalari Avtomat ravishda ishlaydi.
Loyiha ijrosining asosiy koordinatori Axborot va kommunikatsiya texnologiyalari vazirligi bo‘ladi.
2030 yilda O‘zbekiston Global innovatsiya indeksi reytingida kuchli 50 ta mamlakat qatoridan joy olishni rejalashtirmoqda. Ayni shu asnoda 2019-2021 yillarda O‘zbekiston Respublikasining innovatsion rivojlanish strategiyasi ishlab chiqilgan.
