Apple расман Watch Series 9 ва Watch Ultra 2 соатларини тақдим қилди!
Кутилганидек, кеча Apple'нинг Wonderlust тақдимоти бўлиб ўтди. Тақдимот компаниянинг янги авлод Watch Series ақлли соатлари намойишидан бошланди.
Apple Watch Series 9
Apple Watch Series 9 соатидаги энг катта ўзгаришлардан бири S9 чипи бўлиб, ушбу икки ядроли процессор 5.6 миллион транзисторларга эга ва бу аввалги S8 чипи транзисторлари сонидан 60% га кўпроқдир. Янги чип билан Siri'га қилган мурожаатларингиз янада тезроқ кўриб чиқилади ва энди Siri сизга янада аниқроқ жавоблар беради.
Шу билан бирга S9 чипи ўзи билан янги бир ишора хусусиятини ҳам олиб келади: энди сиз кўрсаткич ва бош бармоқларингизни бир-бирига теккизиш билан соат функсияларини бошқара оласиз. Ушбу янги ишора ҳаракати Apple ўзининг Vision Pro кўзойнакларини бошқариш ҳаракатларини ҳам эслатиб юборади. Шундай қилиб, янги ишора ҳаракати билан сиз қўнғироқларга жавоб беришингиз, мусиқани пауза қилишингизни (ёки аксинча) ва бошқа бир неча амалларни бажаришингиз мумкин.
Таъкидлаш жоизки, шунга ўхшаш бошқарув ҳаракатини аввал ҳам AssistiveTouch орқали амалга ошириш мумкин эди, фақат уни амалга ошириш бироз "қўполроқ" эди. Янги икки бармоқли бошқарув хусусияти октабр ойида янгиланиш сифатида юборилади.
Шунингдек, Watch Series 9 иккинчи авлод ултра кенг полосали чипга эга бўлиб, у сизга йўқолган iPhone смартфонингизни топишда катта ёрдам бериши мумкин. Бунда соат сизнинг смартфонингизга бўлган таҳминий масофа ва йўлни кўрсатиб туради. Смартфонингизга яқин келиб, уни топганингизда эса соат сизга қисқа вибрация беради, товуш чиқаради ва сиз унинг экранидаги масофа нолга етганлигини кўрасиз.
Янада сезиларли яхшиланишлардан бири соат экранида: компаниянинг таъкидлашича Watch 9 дисплейи 2000 нит максимал ёрқинликка чиқа олади. Бу ўтган йилги Watch 8 экрани максимал ёрқинлигиндан 2 баравар кўп. Ёруғлик кам бўлган, қоронғу ҳолатда эса соат ёрқинлиги 1 нитгача тушиши мумкин. Бундай экран билан соатнинг батареяси ўртача 18 соатга, кам қувватли режимда эса 36 соатгача етади.
Янги соатни зангламас пўлатдан ясалган корпус ёки тўлиқ қайта ишланган алюминийдан тайёрланган корпус билан топишингиз мумкин. У учун маълум камарлар комбинация билан эса сиз Apple'нинг илк тўлиқ "углерод нейтрал" маҳсулотига эга бўлишингиз мумкин, қўлингиздаги соат иложи борича табиатга зарарли газларни чиқармаган ҳолда ишлаб чиқарилган. Буни Apple'нинг 2030 йилгача ўз бизнесларини тўлиқ углерод нейтрал режимига ўтишда қўйган катта қадамларидан бири дейиш мумкин. Агар сиз янги углерод нейтрал Watch 9 соатини харид қилсангиз унинг қутисида яшил белгини кўришингиз мумкин.
Apple Watch Series 9 соатлари 41 ёки 45 мм ўлчамларда жилосиз алюминий корпусда пушти, тунги қора, кумуш ва ёрқин юлдуз рангларда, ҳамда, зангламас пўлатдан ясалган жилоли корпусда олтин, кумуш ва графит рангларда таклиф қилинади. Алюминий корпусли модел учун нархлар 399 доллардан, пўлатдан ясалган корпусли модел учун эса нархлар 699 доллардан бошланади. Сотувлар расман 22 сентабрдан бошланади.
Apple Watch Ultra 2
Ўтган йилги Far Out тақдимотида дебют қилган Watch Ultra ақлли ва мустаҳкам ҳимояли соатининг бу йил иккинчи авлоди – Apple Watch Ultra 2 тақдим қилинди. У ҳам худди Watch Series 9 каби S9 чипи ва иккинчи авлод ултра кенг полосали чип билан жиҳозланган, ҳамда, бармоқларни бир-бирига теккизиш билан бошқариш хусусиятига эга ва шу билан бирга у ҳам экран борасида сезиларли яхшиланиш олган: унинг янги дисплейи 3000 нит ёрқинликка чиқа олади – бу Apple'нинг ақлли соатлари тарихидаги энг юқори натижа бўлиб, ушбу кўрсаткич ўтган йилги илк модел дисплей ёрқинлигидан икки баравар кўпроқдир.
Янги соат батареяси ўртача 36 соатга, кам қувват режимида 72 соатгача етади. Унинг ҳимояси билан сиз қўрқмасдан 40 метргача чуқурликда сув остида сузишингиз, шунингдек сувга эркин шўнғиш амалиётларини ҳам бажаришингиз ҳам мумкин. Бундан ташқари, соат саёҳатчилар ва бошқа очиқ ҳавода ёки экстремал шароитларда спорт билан шуғулладиганлар учун бир қанча фойдали функсияларга эга. Ахир ушбу қурилма айнан улар учун чиқарилган.
Apple Watch Ultra 2 титан корпусга эга ва у 49 мм ўлчамда 799 доллар нархда таклиф қилинади. Уни ҳам сиз углерод нейтрал камарлар билан харид қилишингиз мумкин. Сотувлар расман 22 сентабрдан бошланади.
Ҳа айтганча, Apple Watch Series 9 ҳам, Apple Watch Ultra 2 ҳам watchOS 10 версиясида ишлайди ва у соатлар учун виджетлар, янги соат юзлари каби янгиликларни ўз ичига олади.
