Huawei Mate 60 Pro смартфони пешонасида учта тешик билан чиқарилди!
Барчамизга таниш бўлган Huawei компанияси бугун Хитойда ортиқча дабдабаларсиз ўзининг янги смартфони – Huawei Mate 60 Pro моделини намойиш қилди ва уни пешонасида учта тешиги илк смартфон дейишимиз мумкин. Улар нима учун эканлигини сизни ҳам қизиқтираётганлиги аниқ. Бу учта селфи камерами? Йўқ, аслида селфи камера бу ерда битта ва у 13 MP. Қолган тешиклардан эса 3D ToF сенсорлари, яъни Face ID учун керак бўладиган сенсор ва лазерлар ўрин олган. Дастурий таъминот воситаларига раҳмат, экрандаги бу "гўзаллик"ни сиз битта тугма билан Apple'нинг ҳозирги iPhone 14 Pro смартфонларининг динамик ороли кўринишига ўзгартириб қўйишингиз мумкин.
Ноодатий тешиклар учлигини ҳисобга олмаганда Huawei Mate 60 Pro смартфонини аввалги Mate 50 Pro модели устидан яхши янгиланиш дейиш мумкин. Масалан, ушбу янги модел экрани олдингисиникидан сезиларли даражада катта: 6.82 дюймли LTPO OLED дисплейнинг янгиланиш тезлиги 120 герц, ёрқинлик мослашуви эса 1440 герц бўлиб, у 2720×1260 пикселлар резолюстиясига эга ва у иккинчи авлод Kunlun Glass билан ҳимояланган.
Смартфоннинг орқа томонидаги камералари Huawei'га хос дизайнда, айлана ичида жойлашган. Уларнинг асосийси аввалги Mate 50 Pro моделида бўлгани каби 50 MP ва у тасвирни оптик барқарорлаштириш, PDAF, ҳамда, f/1.4 ва f/4.0 орасида ўзгарувчан диафрагмага эга. Қолган камераларнинг бири 12 MP (f/2.2) ултра-кенг сенсори бўлса, бошқаси 48 MP (f/3.0) телефото сенсордир.
Капот остида қурилма қайси чипсет билан жиҳозлангани аниқ эмас, лекин у 2021-йилги Kirin 9000S эканлигини таҳмин қилинмоқда. У, эҳтимол, Snapdragon 888 учун рақобатдош бўла олади. Ушбу чипсет билан смартфон Harmony 4.0 операцион тизимида ишлайди. Унинг 5000 мА/с батареяси сим орқали 88 Вт тезликда, симсиз эса 50 Вт тезликда қувватланади. У ҳатто бошқа қурилмаларга 20 Вт тезликда қувват бера олади. Маълумот учун – бу iPhone 14 смартфонининг зарядланиш тезлигидир. Қўшимчасига смартфонда хотирани кенгайтириш жойи, инфрақизил нур узатувчи ва бармоқ изи сканери (экран остида) ҳам бор.
Алоҳида қайд этиш керакки, Huawei Mate 60 Pro смартфони Хитойда сунъий йўлдош орқали хабар алмашишни қўллаб-қувватлайди. Қолган алоқа ва уланиш хусусиятларига эса 4G, Wi-Fi 5, Bluetooth 5.2 ва NFC функцияларини қўшиш мумкин.
Смартфон орқа томонида икки тонли бўлиб, у тўрт хил рангларда таклиф қилинади. Булардан оқ ва оч яшил рангли вариатларнинг юқори қисми шишадан қилинган бўлса, оч пушти ва қора рангли вариантдагилари теридан қилинган.
Huawei Mate 60 Pro смартфонини 12 GB RAM билан 256/512 GB ёки 1 TB хотирада сотиб олишингиз мумкин бўлар эди, агар у фақат Хитой учун тақдим қилинмаганида. Маълум бўлишича, 12+512 GB хотира вариатидаги модел нархи 6999 юан ёхуд 11 миллион 600 минг атрофида. Ҳа, айтганча, смартфон қутида қувватловчи адаптер, USB Type-C кабел, шаффоф ҳимоя ғилофи, смартфонга заводда ўрнатилган ҳимоя ойнаси, SIM-картани чиқариш игнаси, қўлланма ва бир қанча сертификатлар билан келади.
