Stories қўйиш вақти келди! Энди сиз ҳам Telegram'да "история" қўя оласиз!

Бир неча кун аввал Telegram аллақачон Stories функциясини барча учун тақдим қилганига қарамай ундан Ўзбекистон ва бошқа айрим давлат фуқаролари фойдалана олмаётганлиги ёхуд у сўнгги янгиланишдан кейин ҳам пайдо бўлмагани ҳақида ёзган эдик. Шундан сўнг кеча тунда Telegram'да Stories қўйиш имконияти барча ўзбекистонликлар учун пайдо бўлганлиги маълум бўлди. Шу муносабат билан Telegram Stories'га оид қуйидаги 10 та фактни улашмоқчимиз.

1. Telegram'да сиз бошқаларнинг Stories'ларини уларни контактини ўчириб юбормасдан ёки блокламасдан яшириб қўйишингиз мумкин. Бунинг учун Stories'лар қаторидан уларнинг профиллари устига босиб туринг ва пайдо бўлган менюдан "Stories'ни яшириш" тугмасини босинг.
2. Одат бўйича сиз тез-тез алоқа қилиб турадиган 5 та контактларингиздан Stories қўйилганлиги ҳақида билдиришномалар қабул қиласиз. Сиз шу каби билдиришнома созламаларини барча фойдаланувчилар учун ёқишингиз ёки ўчиришингиз мумкин. Бунинг учун уларнинг Stories'ларига ўтинг ва юқори бурчакдаги уч нуқтали тугмани босиб, кейин эса "Stories ҳақида хабар беринг" тугмасини босинг.
3. Кимнидир Stories'ларини кўриш давомида сиз уларга юракчани босиш билан реакция билдиришингиз ёки матн билан жавоб ёзишингиз мумкин. Таъкидлаш жоизки, юракчани босиб туриш билан сиз бошқа юзлаб эможиларнинг бири билан реакциялар қолдиришингиз ҳам мумкин.
4. Telegram'да Stories яратишда сиз тасвирга олиш тугмасини бир марта босиш билан сурат олишингиз, уни босиб туриш билан эса видеога олишни бошлашингиз мумкин. Видеога олиш давомида тасвирга олиш тугмасини чапга суриш билан ҳаракатни қулфлаб қўйишингиз, экранни ўнгга суриш билан камераларни ўзгартиришингиз, экранни юқорига суриш билан эса зум қилишингиз мумкин.
5. Тайёр медиани Stories'га қўйиш жараёнида сиз унга матн, стикер, GIF ёки локация қўшишингиз, шунингдек, унинг ёрқинлиги, контрасти ва ранглар тўйинганлигини ўзгартира оласиз. Ҳа, айтганча, Stories'ларингизни уларни жойлаб бўлгандан кейин ҳам исталган вақт таҳрирлашингиз мумкин.
6. Telegram'га Stories жойлашда сиз ҳам олд, ҳам орқа камераларингиздан фойдаланишингиз мумкин. Айтиш керакки, ушбу бу функция фақат уни қўллаб-қувватлайдиган айрим кучли смартфонларда ишлайди.
7. Stories'ларингизни сиз барча учун, фақат контактларингиз учун, фақат яқин дўстларингиз учун ёки фақат танланганлар учун кўрсатишингиз мумкин. Шунингдек, сиз Stories'ларингизни скриншот қилишларига ёки профилингизга сақлаб қўйилишига рухсат беришингиз/бермаслигингиз ҳам мумкин.
8. Stories'ларингизни вақти тугагандан сўнг улар Stories'лар архивига тушади. У ерда сиз эски Stories'ларингиз кўришингиз, ўчириб юборишингиз ёки профилингизга қўшиб қўйишингиз мумкин бўлади.
9. Stories'ларингизни жойлаганингиздан сўнг сиз уларнинг муддати тугагунга қадар уни кимлар, қачон кўрган ва реакция билдирганини кўришингиз мумкин. Бунда ушбу статистика Stories муддати тугагандан сўнг йўқолади, фақат умумий кўришлар ва реакциялар сони қолади.
10. Агар сиз Premium обунага эга бўлсангиз унда сиз Stories'лар билан боғлиқ қуйидаги афзалликларга ҳам эга бўласиз:
    
    Устуворлик – сизнинг Stories'ларингиз бошқаларга биринчилардан бўлиб кўрсатилади;
    Яширинлик – сиз бошқаларнинг Stories'ларини кўришингиз мумкин, лекин улар буни билишмайди (25 дақиқа ичида);
    Абадий кўриш тарихи – ҳатто Stories'ларингиз 24 соатдан кейин йўқ бўлганда ҳам уларни кўрганлар тарихи йўқолмайди;
    Махсус амал қилиш муддати – Stories'ларингиз қанча вақтда йўқолишини 24 соатдан кўра 6, 12 ёки 48 соатгача ўзгартириш имконияти;
    Stories'ларни галареянгизга сақлаб қолиш – исталган Stories'ларни галареянгизга юклаб ололасиз, агар улар ҳимояланмаган бўлса;
    Яхшироқ субтитрлар – Stories'ларингиз остига 10 карра каттароқ субтитрлар жойлаш ва шу билан бирга линк ва хоҳиший форматлаш имкониятлари;
    Кўпроқ Stories'лар – кунига 100 тагача Stories қўйиш имконияти.

Stories қўйиш учун Telegram иловангиз энг сўнгги версияда бўлиши керак. Ортиқча муаммолар юзага келмаслиги учун Telegram'нинг фақат расмий иловасидан фойдаланиш тавсия қилинади.