AppleGPT – ChatGPT қотили!
Apple компанияси ChatGPT билан рақобатлаша оладиган сунъий интеллект воситалари устида иш олиб бормоқда. Бу ҳақидаги хабарлар аввалроқ фақат миш-миш сифатида қабул қиланаётганди. Аммо Apple раҳбари Тим Кук илк марта бу хабар рост эканлигини тасдиқлади.
Чораклик ҳисобот конференциясига кўра, Apple компаниясининг тадқиқот ва ишланмаларга сарфлаган харажатлари ўтган йилнинг шу даврига нисбатан қарийб 14 фоизга ўсди ва йилнинг сўнгги чорагида 22,61 миллиард долларни ташкил этди. Тим Кукнинг қўшимча қилишича, Apple узоқ йиллар давомида сунъий интеллектни ривожлантирмоқда ва бу соҳага катта миқдорда сармоя киритмоқда.
Тим Кук Routers агентлигига берган интервюсида шундай баёнот берди: "Биз бир неча йиллардан буён сунъий интеллектнинг кенг кўламли технологиялари, жумладан, генератив сунъий интеллект бўйича тадқиқотлар олиб бордик. Биз ушбу соҳага сармоя киритишда ва инновациялар киритишда давом этамиз, маҳсулотларимизни ушбу технологиялар ёрдамида ривожлантиришга имкон берамиз ва одамларга ҳаётларини осонлаштиришга ёрдам берамиз. Шубҳасиз, биз жуда кўп маблағ сарфлаяпмиз ва бу, кўриб турганингиздек, илмий-тадқиқот ишларига сарфланган маблағларда ўз аксини топмоқда."
Apple бош директори компания "сунъий интеллект ва машинавий таълимни фундаментал технологиялар сифатида кўришини ва улар Apple яратадиган деярли ҳар бир маҳсулотга киритилган"лигини қўшимча қилди. Шунингдек, у кўп йиллар давомида компания генератив сунъий интеллект соҳасидаги тадқиқотларга маблағ сарфлаётганини яна бир бор таъкидлади.
Ушбу тадқиқот ва ишланмаларнинг самараси бозорда қачон аниқроқ намоён бўлишини Apple вакиллари чораклик тадбирда аниқлик киритмадилар. Бошқача қилиб айтганда, AppleGPT бозорда қачон пайдо бўлиш вақти ҳозирча ноаниқ.
