Samsung букламафонлар борасида навбатдаги қадамни ташламоқда!
Йил бошида флагманлар ва ўрта синф смартфонларини тақдим қилиб бўлгандан сўнг, Samsung эндиликда ўзининг янги авлод планшетлари, Galaxy Tab С9 сериясини тақдим қилишга тайёрланмоқда. Албатта, планшетлар бироз янгича кўриниш ва техник хусусиятлар янгиланишига эга бўлишади, лекин бундан ҳам нима қизиқ эканлигини биласизми? Компания янги турдаги планшет ёхуд янги турдаги букланадиган қурилма тайёрлаётган бўлиши мумкин!
Яқинда Samsung ўзининг янги турдаги уч қисмли букланадиган қурилмасини тайёрлаётгани ҳақидаги хабарлар тарқалган эди. Янги улашилган маълумотларга кўра, бу "Galaxy Z Tab" номли планшет бўлади. Ўз номидан маълумки, у компаниянинг Z сериясидаги букланадиган қурилмалар оиласининг янги аъзоси бўлади.
Афсуски, янги турдаги букланадиган планшет ҳақида унчалик кўп маълумотлар мавжуд эмас. Бу аввал миш-миш қилинганидек уч қисмли букланадиган планшет бўладими ёки шунчаки Galaxy Z Fold каби бир марта букланадиган планшет бўладими буниси бироз ноаниқ.
Агар узунқулоқ хабарлар тўғри бўлиб чиқиб, Samsung'нинг янги букланадиган қурилмаси уч қисмли планшет бўладиган бўлса, эҳтимол, биз унинг қандай кўринишга эга бўлишини биламиз. Қуйида компания бир неча йил аввал патентлаган уч қисмли букланадиган планшет чизмаси ва унга асосланиб дизайнер Саранг томонидан томонидан яратилган (LetsGoDigital орқали) рендерларни кўришингиз мумкин:
Samsung топширган патент маълумотларига кўра, Galaxy Z Fold Tab (компания ўшанда қурилмани шундай номлаган экан ва бу бўлажак букламапланшет учун ҳам амал қилиши мумкин) планшетининг букланадиган қисмлари ҳам ичкарига, ҳам ташқарига букланади. Бунда сиз планшет экранини ҳимоя қилиш учун унинг ён қисмларини ичкарига буклаб қўйишингиз ёки кичикроқ дисплейга эга бўлиш учун ён қисмларини ташқарига қайириб қўйишингиз мумкин бўлади. Шунингдек, рендерларда планшет буклангандан кейин унинг "қанотлари" орасига S Pen қўйиш мумкинлиги ҳам креатив тарзда кўрсатиб берилган, лекин бу шунчаки дизайн муаллифи фикри ва бу шунчаки концепт эканлигини унутмаслик керак.
Таъкидлаш жоизки, патент чизмалари ҳар доим ҳам ҳақиқатга айланавермайди ва албатта, Samsung учун фақат битта ошиқ-мошиқли планшет чиқариш осонроқ бўлади – компания бу борада Galaxy Z Fold билан тўрт йиллик тажрибага эга ва унинг экранини планшет даражасига олиб чиқиб қўйиш муаммо бўлмаслиги аниқ.
